ស្ថានទូតជប៉ុន និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុនបានអញ្ជីញបំពេញទស្សនៈកិច្ចកំពង់ផែពហុបំណងកំពត និងតំបន់សេដ្ឋកិច្ចពិសេសកំពត

ចុះផ្សាយ៖ ថ្ងៃទី ១៥ ខែ តុលា ឆ្នាំ ២០២៤

នាព្រឹកថ្ងៃទី ១៥ ខែ តុលា ឆ្នាំ ២០២៤ គណៈប្រតិភូជប៉ុនប្រចាំកម្ពុជា រួមជាមួយនឹងអ្នកតំណាងពីទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) បានអញ្ជីញបំពេញទស្សនៈកិច្ចស្វែងយល់អំពីតំបន់សេដ្ឋកិច្ចពិសេសកំពត និងកំពង់ផែពហុបំណងកំពត។ ដំណើរទស្សនៈកិច្ចនេះបានបង្ហាញពីការគាំទ្រជាបន្តបន្ទាប់របស់ប្រទេសជប៉ុនទៅលើកំណើនសេដ្ឋកិច្ចនិងការអភិវឌ្ឍហេដ្ឋារចនាសម្ព័ន្ធរបស់ប្រទេសកម្ពុជា។ 

គណៈប្រតិភូបានសម្តែងនូវការចាប់អារម្មណ៍ក្នុងការសិក្សាបន្ថែមអំពីសក្តានុពលនៃតំបន់ខេត្តកំពតដែលជាមជ្ឈមណ្ឌលសម្រាប់ពាណិជ្ជកម្ម និងការវិនិយោគ។ ក្នុងអំឡុងពេលទស្សនៈកិច្ចនេះ គណៈប្រតិភូជប៉ុនប្រចាំប្រទេសកម្ពុជាបានអញ្ជីញទស្សនាឋបនីយភណ្ឌផ្សេងៗនៅក្នុងតំបន់សេដ្ឋកិច្ចពិសេស និងកំពង់ផែដើម្បីសង្កេតមើលពីរបៀបដែលកន្លែងទាំងនេះត្រូវបានរចនាឡើងដើម្បីទាក់ទាញអាជីវកម្ម និងជំរុញការងារក្នុងស្រុក។ 

តំបន់សេដ្ឋកិច្ចពិសេសកំពត មានគោលបំណងបង្កើតនូវបរិយាកាសអំណោយផលសម្រាប់វិស័យឧស្សាហកម្ម ខណៈដែលកំពង់ផែពហុបំណងកំពតមានគោលដៅពង្រឹងវិស័យភស្តុភារនិងការតភ្ជាប់ក្នុងតំបន់។