ក្រុមហ៊ុនកំពតផតមានទីតាំងស្ថិតនៅភូមិគីឡូ១២ ឃុំកោះតូច ក្រុងបូកគោ ខេត្តកំពត ព្រះរាជាណាចក្រកម្ពុជា បានដាក់សម្ពោធកំពង់ផែពហុបំណងកំពត (KMP) និងតំបន់សេដ្ឋកិច្ចពិសេសកំពត (KSEZ)  ឱ្យប្រើប្រាស់ជាផ្លូវការនៅថ្ងៃទី៦ ខែមិថុនា ឆ្នាំ ២០២៤។

កំពង់ផែពហុបំណងកំពត (KMP) បានក្លាយជាកំពង់ផែទឹកជ្រៅឯកជនដំបូងគេ ព្រមទាំងជាកំពង់ផែសមុទ្រជ្រៅទី២ និងជាកំពង់ផែអន្តរជាតិទី៣ សម្រាប់ដឹកជញ្ជូនកុងតឺន័រនៅកម្ពុជា ដែលមានបំពាក់នៅគ្រឿងបរិក្ខារ និងហេដ្ឋារចនាសម្ព័ន្ធកម្រិតស្ដង់ដារដែលត្រៀមជាស្រេចសម្រាប់ការនាំចូលនិងនាំចេញសម្រាប់ទំនិញប្រភេទកុងតឺន័រ និងទំនិញទូទៅ។ កំពង់ផែពហុបំណងកំពតជាមជ្ឈមណ្ឌលដ៏សំខាន់សម្រាប់ពាណិជ្ជកម្មទាំងក្នុងស្រុក និងអន្តរជាតិដែលអាចជួយសម្រួលដល់ការដឹកជញ្ជូនទំនិញទៅ និងមកពីតំបន់អាស៊ីប៉ាស៊ីហ្វិក តំបន់ឆ្នេរភាគខាងលិច និងខាងកើត និងតំបន់ផ្សេងទៀត។

 តំបន់សេដ្ឋកិច្ចពិសេសកំពត (KSEZ) ជាទីតាំងដ៏មានសក្តានុពលដែលផ្តល់អត្ថប្រយោជន៍ជាច្រើនដើម្បីទាក់ទាញអ្នកវិនិយោគក្នុងស្រុក និងអន្តរជាតិ ជាពិសេសទៅលើការលើកលែងពន្ធ សម្រួលដំណើរការបទប្បញ្ញត្តិ និងការកែលម្អហេដ្ឋារចនាសម្ព័ន្ធឱ្យប្រសើរ។